العصفوره والخير

عاملين ايه يا اولاد ازيكم وحشتونى وايه اخبار التدوين معاكم ….. النهارده حكلمكم عن احب مدونتين الى قلبى

للخير يحمل مصعب

فى البدايه هات قلم وشد خط بالطول حيتكون عندك نص يمين ونص شمال وكل نصف حكايه لوحدها وسعات كتير مصعب بيجدد نصف من دون الاخر نبدا بالنصف الايمن دا بقا النصف الميز ليا على الاقل حتلاقى فيه من فوق صوره لمصعب وهوه بيشرب العصير وبعدين تجد التعريف ثم تبدا المفاجئات

مصعب بيهتم انه يضع مدوناته المفضله على اليمين وانا بحب اتابع معظم هذه المدونات وبكتشف مدونات جديده من هذا المكان كل فتره اللى بيعجبنى فى الموضوع هو ترتيب المدونات بصراحه روعه تحس انهم متقسمين مجموعات متشابهه ومن فتره قريبه مصعب قام بعمليه حذف عجيبه لبعض المدونات طبعا حتقولولى المدونات دى كانت متوقفه عن العمل حرد بسرعه واقول مش كلها هما 3 بس والباقى كان شغال المهم فكرونى اسئال مصعب عن المدونات اللى حذفها حذفها ليه ؟؟ وطبعا انا سعيد جدا جدا لان مدونتى لها رابط عنده

مصعب وضع مواخرا بالته الوان مدوناته ولسوف تجد حضور قوى لمحمد منير فى اختيار اسماء الاقسام ونلاحظ انتاج كثيف لمصعب بعكس كثير من المدونين الذين يصابون بالملل بعد فتره


مع بدايه تدوينى كان عندى مشكلتين واحده مع الصوت وواحده مع الصوره مشكله الصور حلها مصعب يوم ان وضع صوره على فليكر ويوم ان قرر ان يسمعنا اقرب موسيقى الى نفسه عرفت ان مشكلتى مع رفع ملفات الصوت قد انتهت فجزاك الله خيرا يا مصعب

النص التانى للمدونه يتضمن فى نظرى كتاب مفتوح عن حياه مصعب ومصعب من الذين يهتمون بالتفاصيل حتى ولو كانت كثيره وهو يجيد الربط بين تلك التفاصيل بمهاره يحسد عليها ومن خلال القراه المتتاليه لذلك الجزء فستدرك من هو مصعب ومن هم احبائه ومن هم اصدقائه ولك ان تستنج مدى شعبيه مصعب على الشبكه العنكبوتيه بعدد التعليقات ولسوف تدرك فعليا انه للخير يحمل

مصعب معلش ليا سؤال سخيف شويه : هل حذفت قبل كده مدونات بعد ان نشرتها عشان انا فاكر انى شوفت تدوينه عندك ودلوقتى مش لاقيها

وطبعا انا بفتكر مصعب طول ما انا بتابع اى موقع من دول

مدونته -- شغله -- goear -- flickr

-----

--

عصفوره فى الساحه

مدونه دنانير بقا حدوته لوحدها مدونتها تحفه بجد وانا بعتبرها مدونتى المفضله دنانير تلاقى عندها كل حاجه اخبار وتحليلات خواطر على شويه افكار مجنونه واغانى قديمه وموسيقى حديثه ولوحات وصور متعرف تشوفها غير عندها واكيد حتلاقى الف حاجه وحاجه تعجبك وتخليك تقلب فى الصفحات من دون ان تشعر بالوقت

المدونه بجد متقدرش تتكلم عنها كتير مينفعش غير انك تزور المدونه وتكتشف بنفسك

دنانير من المدونين الذين قد تشعر انك تعرف كل مايدور فى خاطرهم من افكار ومشاعر ومع ذلك تجد فى كل مره شئ جديد لم تتوقعه

فى مره من المرات كنت قررت ان اتوقف عن التدوين ولكنى شاهدت عندها فى نفس هذا اليوم تدوينه بعنوان كان عندى حلم وتوقفت كثيرا عند هذه التدوينه وقررت ان استمر حتى اعثر على حلمى ثم احققه

دنانير رغم كتاباتها المتميزه وتدوينتا الكثيره الرائعه الا اننا لا نعرف عن شخصيتها الحقيقيه الا شئ واحد انها عصفوره تطير فى الساحه