لـسـوف تـلـتقـيـان

سلام الله عليكى ورحمته وبركاته .......... عامله ايه يا فندم.... معلش جيت فجاه وبدون معاد مسبق .... بس

بصراحه كان فى كلمتين فى نفسى وحبيت اقولهم لحضرتك


انا حتكلم بسرعه شويه ..... وكلامى حيكون غير مُرتب و كده ...... يعنى بس يعنى يا ريت حضرتك تفهمى قصدى

انا قبل مااكتب التدوينه دى سئالته امتى ممكن تزعل منى -- كنت متوقع انه يقول لما بتغلس او بتسئل ليه – لكنه رد بسرعه وبساطه -- انا عمرى ما ازعل من حد بحبه

عشان هوه طيب

الاسبوع اللى فات محمد كان فى القاهره وكا المعتاد فاته القطار وطبعا لما وصل اسكندريه قعد يشتكيلى من اهماله فى المواعيد وازاى انه بيضيع على نفسه لحظات حلوه كتيره

عشان هوه غالى

من شهرين عدى عليا فى البيت ونزلنى الساعه 12 بالليل وقعد يتمشى معايا فى شارع المعهد تخيلى حضرتك الدنيا بتشتى والساعه وصلت 2 وهو عمال يتمشا وعمال يحكى عن المستقبل والحلام والغربه بين القاهره والمنيا وانا بصراحه مكنتش مركز معاه لانى كنت سقعان جدا فى اليوم دا وماكنش معايا الجاكت وفى الاخر الشاب الوقور العاقل قعد على الرصيف وبيدنن اغنيه وجيه عزيز الليله فرحان شويه كل ده فين فى قلب السوق

عشان هوه طيب

بكره عيد ميلادى
وانا مالى
انا عايز هديه
معيش فلوس
خلاص اكتب تدوينه عنى وانشرها على اساس انها اهداء ليا
استحاله

ليه
معرفش اكتب عن حد اعرفه خاصه لو انا عارف انه حيقرا الكلام اللى كتبته عنه


عشان هوه غالى

فاكره حضرتك الهديه اللى كان معاها شوكولاته بصراحه انا كنت حكسر الهديه دى بس ربنا ستر تخيلى حضرتك فى اليوم دا لفينا لف لحد ما عجبته هديه من اول جرين بلازا الى محطه الرمل الى شارع الاقبال وكل مره يقول لا الهديه مش مناسبه وفى الاخر طلبت معاه يحط شوكولاته مع الهديه نخيلى حضرتك المشوار من لوران الى زهران فى سموحه عشان الشوكولاته وفى الاخر اشيل انا الهديه وتخيلى حضرتك الهديه كبيره وطبعا على ماوصلنا اول جمال عبد الناصر كان شكلى مضحك لانى كنت بلمع من كُتر ورق الهدايا اللى كان على هدومى ......... كله ده عادى و عادى ان المكروباص يعطل فى اول كوبرى ميامى مفيش مشاكل قاعدين لحد ما السواق يصلح العربيه لكن الاستاذ كان مستعجل وبيقول الوقت اتاخر ... طيب ايه المطلوب ..... ننزل ونكمل مشى .... فوق الكوبرى .... فوق الكوبرى .... والهديه .... تفضل شايلها ...... بصراحه كنت حكسرها وارميها وارميه من فوق الكوبرى .... تخيلى المنظر حضرتك واتنين شباب ماشين على كوبرى ميامى وشايلين هديه بالحجم ده ..... واحساسى ان كل الناس بتبص عليا ...... وفى الاخر اول ما وصانا اخد الهديه ومقلش جزاك الله خيرا او نجاملك فى الافراح او الف شكر..... هو كده طبعه كده متعرفيش تعود ولا ايه


عشان هوه طيب


طبعاحضرتك عارفه مواعيد محمد عمره ما يكون مستعجل ولا متلهف لمعاد العادى جدا انه يكون متاخر مفيش حاجه ممكن تخليه مستعجل ولا حتى ايام الامتحانات لكن انى اكون معاه مره فى المندره بحرى ويوقف تاكسى عشان مستعجل دا حدث كان اول مره اشوفه منه فى خلال مده صداقنا الطويله لدرجه انى ركبت معاه عشان اعرف هوه رايح فين وطبعا عرفت لما مكملناش 3 دقايق وكنا وصلنا لحد اول كوبرى ميامى

عشان هوه غالى

احكيله حاجه تانيه مره كنا مع بعض وكان معانا كتاب اختبارات الذكاء والتحليل النفسى وقعدنا نجاوب على الاسئله وفى الاخر انا قلت عليه انه مجتهد وعمار قال عليه انه مخلص وعلى فكره انا عندى خبره فى اختبارات الذكاء و جلسات التخاطب والقياس الذهنى والحاجات دى بحكم شغلى لكنه رفض وقال انتو متعرفونيش كويس – صحابه من اعدادى ومنعرفهوش كويس _ المهم فى اليوم ده مكنش عايز يبات فى البيت عشان كان محتاج يصحى الفجر عشان يروح محطه سيدى جابر وفضل مقعدنا معاه فى الشارع لحد الساعه 3 الفجر وفى الاخر اقنعناه انه يقضى الوقت الباقى عند عمار

اه صحيح هو مش محب لغيره ياريت تعيدى الاختبار مره تانيه وعلى فكره لو انا كنت قولت عليه محب لغيره برضه مكنش حيقتنع بكلامى اصله مبيسمعش كلام اى حد

انتى عارف انه بيحب يطلع شقه جدته فى الدور الاخير عشان يقعد يتفرج على النجوم بكلمك بجد وانتى عارفه الشقه وعارفه الذكريات اللى فيها

فى النهايه وبصراحه ارجو ان تغفريها لى ... هذا الفتى يحبك الى درجه اكتشفت معها انى لم اعرف معنى الحب بعد كل ما كنت اشعر به وكل كل ما اكتبه من الخيال اذا ما قارنته بما فى قلب هذا الفتى سيصبح ما فى قلبى اوهام فى اوهام عندما يتحث هذا الفتى عن الحب وقلما مايتحث هو ادرك انه يسبقنى فى سباق العاشقين وادرك من صدق نظره عينيه انه سيفوز فى النهايه

انا مع حضرتك انه بيعمل حاجات تجن بس معلش استحمليه

وامانه .. امانه .. امانه ........ تخلى بالك عليه

اخيرا لسوف تتلتقيان اشعر بهاذا

حجات كتيره ممكن تكون موجوده ومنشفهاش

ماعدا الـحـب

للاستماع اضغط هنا