نظريه الجوافه وعوده عمرو

فى البدايه التدوينه دى شخصيه شويه

بكتبها لصحابى محمد واحمد وعمرو و عمار اعز ما املك فى هذه الحياه
لاتحمل عتاب وان كان كان عتاب المحبين حب ولا تحمل شكوا وان كانت الشكوا للصديق من شروط الصداقه ولكنها فى النهايه تحمل كل ما يحمله قلب صديق من حب وفخر وشكر وامتنان لمن كتبت الحياه ان يسيروا معى فى طريق حياتى


عمار يا عربيه الجوافه

بص يا حبيبى انت خلاص كبرت .... لازم تعقل وتبطل شغل المجانين بتاعك ده
الحياه بتمر ومبتسناش حد ..... مفيش مجال للهزار
الدنيا ذى عربيه الجوافه امبارح كنت صغير كان مسموح انك تلعب حوالين العربيه
تغلس على الواقفين بيشتروا
تاخد جوافيه وتطلع تجرى
النهارده خلاص ... الايام اتغيرت .... انت كبرت ..... واللى كان مسموح بيه امبارح
صار ممنوع النهارده
النهارده مفيش قدامك غير انك تقف ذى الناس الكبيره العاقله تشترى من على عربيه الجوافه
الكلام دا كان موجه ليا من عمار فى نفس الليله اللى كان مسافر فيها احمد الى دبى للعمل
عمار حبيبى بما اننا صحاب من ايام اعدادى تسمحلى اقولك حاجه
انا مش ناوى اتغير بل بالعكس حعيش حياتى ذى ما انا عايز حتى لو بقيت فى يوم من الايام صاحب عربيه الجوافه
برده حفضل العب جنبها

الحياه بالنسبه لى زى دريم بارك ملاهى وكلها لعب ولازم تلعبهم كلهم عشان توصل لقمه المتعه و رغم ان فى لعب متعبه زى دوامه قيصر مثلا الا انى لازم العبها رغم انى فى كل مره بنزل منها دايخ وفى دريم بارك لازم تاخد بالك عشان متقعش وانت بتلعب ولازم تمسك جامد وانت بتركب اللعب الخطره ولازم تصوت بصوت عالى وانت فى قطر الموت عشان تكون مستمتع عارف انا بفتكر دريم بارك ليه ؟ فاكر لما كنا فى ثانوى ورحنا دريم بارك وانت قلتلى انكلما تكبر حتبنى مدينه ملاهى اجمل منها !! شكلك نسيت بس انا عمرى ما انسى

وعارف ايه الفرق بين عربيه الجوافه ودريم بارك

عربيه الجوافه ممكن تلاقى الناس حواليها تعيسه ناس بتتظاهر بالفرح ولكن من جوه قلوبها مليانه حزن وشجن لكن فى دريم بارك غالبا حتلاقى كل الناس فرحانين

حاجه تانيه لما تروح دريم بارك حتلاقى واحد يقبلك بالتراحاب
فى دريم بارك ومن على الباب دوبى يقبلك بالترحاب تعالى ..... تعالى بينا ياله انته والشله العب واتسلى وكمان عيب

لما تكون متخصص فى علم الاتصالات وتشبه الحياه بعربيه جوافه

ايها المسافرعذر من دموعى فلطيفك آنات عتاب

احمد سامى خطب من حوالى شهرين وكانت ليله الخطوبه اجمل من الف ليله وليله وليله امبارح احمد سافر الامارات العربيه للعمل
تروح وتيجى بالسلامه يا احمد

انا بعتذرلك لانى مجتش اوصلك للمطار رغم انى كنت مع محمد وعمار ووصلت لاول الشارع الا انى مقدرتش اكمل معاهم لانى كنت عارف لو شفتك وانت نازل بالشنطه حفقد اعصابى وابتدى ابكى ودموعى تنزل على خدى ...... وانا طبعا عارف انك مكنتش مستحمل فكره الوداع من الاساس بس نقول ايه ...... حتوحشنا .... خلى بالك على نفسك

عمرو خلى عندك دم واسئال علينا انت عارف عمار عمره ما بيتصل بحد ومحمد مواعيده بايظه طول عمره واحمد سافر وانا بوجهلك نداء ياريت

ياريت متعملهاش مشكله وتعد تفكر احنا بعدنا عنك ولا انت آلى بعدت
على فكره انت وحشتنا كلنا ويوم ما احمد ما سافر مكنش ناقصنا حد الا انت احنا عارفين ان احنا مقصرين معاك بس

لازم تسامحنا وتبطل حجه المذاكره والدراسه والحاجات دى وانت عارف لو ليك مزاج حتشفنا

احمد سافر يا عمرو وانجرحنا ونقصنا واحد متزود همنا وتبعد انت كمان
امانه عليك وحياه اللى كان بنا سامحنا( وحياه هايدى ) ارجع بقا - وبطل سخافه

محمد حبيبى انا مش حتغير ومش حمشى فى الشارع مربع ايدى وباصص فى الارض وغصبن عنك حتفهمنى الحاجات

اللى مش فاهمها وعلى فكره انا مش عايز اروح القاهره معاك انا عارف السكه كويس ولو على المترو مش حقرب منه خالص ومش حخليك تقابل الراجل بتاعى ابدا ابدا وشكرا على معلومه ان احنا من منطقه واحده
اه حاجه تانيه انا خلاص صرفت نظر عن موضوع الحب دلوقتى وياريت قبل ماتتهم حد بالجنون بص على نفسك وانت واقف على المحطه مستنى وعمال تتكلم فى التلفون

انا بكتب التدوينه دى وانا سعيد لان عندى صحاب بالروعه دى رغم ان حالنا سعات بيتلغبط بس احنا صحاب اوى اوى اوى من واحنا مع بعض فى المدرسه من ايام اعدادى ومفيش حد فينا شبه التانى بس الحاجه الوحيده المشتركه بنا اننا

بنحب بعض

عمار حاليا معيد فى كليه الهندسه
عمرو بيدرس للحصول على شهاده تخصص فى الشبكات بعد حصوله على البكاليروس فى البرمجه
احمد سامى مهندس معمارى بيعمل فى الامارات حاليا
محمد فى كليه حاسبات ومعلومات جامعه حلوان

على فكره انا الكبير بتاع الشله دى
صداقنتا لوحه رسمت بالوان الفرح
صدقتنا انشوده عزفت بلحن الحب
صداقتنا قصه كتبت بقلم من وفاء
وعلى سطور من اخلاص ووفاء للعهد والوعد

الهم فاظلنا بظلك يو م لا ظل الاظلك واجعلنا فى الجنه اخوانا على سرر متقابلين


اه تعاطفك لوحده مش كفايه

( amr_soviet@hotmail.com ) ارسل رساله الى عمرو عشان يرجع

او اسمع النشيد

او اتفرج على صور بتاعتنا فى اخر مره كنا فيها مع بعض

تدوينه محمد بعد سفر سامى