1-2-3-4

-1 – السلام عليكم

-2 – عاملين ايه

-3- وحشتونى

-4- ارجوا الانتباه

كنت قد قررت انا المذكور اعلاه من قبل ان تكون تلك هى مدونتى

القبل الاخيره وتكون المدونه الاخيره ختام بسوره العصر كما علمنا الرسول صلى الله عليه وسلم لكننى تراجعت عن هذا القرار مؤقتا لعده اسباب

-1- رد مولانا على احدى مدوناتى السابقه

-2- مدونتين نشرهم الهوارى قال فى واحده منهم انى وحشته

-3- ؟..؟..؟..؟..؟..؟..؟..؟..؟..؟..؟

المهم انا حرد على الاثنين كل منهما بخطاب ارجوا ان يقبلوا ان يستلموه وممكن انشر بعد كده كام تدوينه كنت كاتبهم من فتره

--...--...--...--..--..--

..--..

الى صديقى / احمد الهوارى

بعد التحيه والسلام وكل ايات الاحترام اقول لك صادقا انك وحشتنى بجد وحشتنى . صحيح منعرف بعض الا من حوالى 6 شهور ولم نلتقى الا مرات قليله الا ان القلوب كما قال رسول الله صلى الله عليه وسلم بين اصبعين من اصابع الرحمن يقلبهما كيف يشاء والارواح جنود مسيره ايها تقارب ائتلف وبما اننا على موجه واحده فسمع منى ما يلى

شكلك مخنوق ومضايق وقرفان وزهان وشويه وحتدخل معركه مع الكوكب دا كله باللى فيه وكلامك مححسنى انك قنبله على وشك الانفجار من شده الضغط ودا شئ عادى كل انسان بيعدى على المرحله دى مرحله الرغبه فى لقاء وجه الله رغم عدم استعدادنا لهذا اللقاء المرحله دى اساسيه لكل ذو عقل سكن فى يوم من الايام مصرنا المحروسه .

..--..--

.-.
ملعب كبير

شئ عادى فى بلد ذى بلدنا الحبيبه مصر حفظها الله شعبا دون حكومه ( ربنا يخدهم قول امين ) ان ياتى عليك وقت تحس فيه بالملل وعدم الرغبه فى الحياه المجتمع المصر كله يمر بتلك المرحله وطبعا من المستحيل ان تحل مشاكل مصر كلها مره واحده حتى تستطيع ان ترتاح ولكن واحده واحده ومتخدش كل حاجه على صدرك ودماغك ( قلبك وعقلك ) جرب مره كده تديها بالقدم وتشوط مشاكلك بره ملعب حياتك وشوط يا حبيبى وخلى بالك اوعا تعمل مع حد فاول وتعوره وتزعله منك ليطردك من حياته وما الدنيا يا هوارى الا ملعب كبير اكبر من ملعب الاهلى فى مدينه نصر

وآلعب انت يا معلم

..--..-- ..

.-.
فنون تطبيقيه

اكيد اللى دخل كليه فنون تطبيقيه ودرس تصوير فوتغرافى يعرف ان اى صوره تكون اوحاديه المنظور بمعنى انها ......المهم لو مسكت اى صوره حتلقيها ذات بعد واحد مسطحه هنا بقا الخيال لازم يلعب والدماغ تشتغل وتتخيل الحاجات الحلوه اللى فى الصوره طبعا سيادتك حتقلى ان حياتك صوره ابيض واسود حقولك بلاش تشائم وعلى فكره ايام ماكنت شغال فى مطبعه كانت احلى الصور اللى بطبعا ابيض واسود ولما كان بيجلنا زبون معاه صوره فيها تفاصيل كتيره كنا بنرمى عليها لون واحد لو مظهرتش نرمى لون تانى لحد ما نوصل لاربع الوان فخد حياتك كده بص عليها وخلى عقلك يظهرلك الحاجات الحلوه اللى فيها ولو مقدرتش لونها بلون واحد وحبه حبه حتلاقى الصوره كلها الوان وما الدنيا يا هوارى الا البوم صور

ولون انت يا معلم

..--..-- ..

.-.
عارف يا احمد انا سعات بحس انى حيران فى الدنيا دى وبحس اننا استغفر الله استغفر الله اتخلقنا وفينا حاجه غلط يس برجع استغفر الله وبقول ان الله خلقنا وكرمنا وسخرلنا كل الكون عشان نعبده(و لقد كرمنا بني آدم و حملناهم في البر و البحر و رزقناهم من الطيبات و فضلناهم على كثير ممن خلقنا تفضيلا )وربنا سبحانه وتعالى مخلقش الكون دا عبث(أفحسبتم أنما خلقناكم عبثا وأنكم إلينا لا ترجعون)وارجع واحتار مش عارف الدنيا تستاهل نتعب فيها اوى ولا نكبر الدماغ عارف يا هوارى سعات بحس انى تايه شبه اللى نزل محطه رمسيس لاول مره ومش عارف هوه رايح فين وجى منين ومش لاقى حد يسئله واللى مجننه اكتر ان الناس رايحه وجايه جنبه كل واحد عارف هو جى منين ورايح فين وهوه محلك سر وفى نفس الوقت مش عايز يمشى مع حد عايز يدور على سكته بنفسه بس الناس مش مسعداه اللى عايز يخده فى سكته واللى يقله اى كلام والسلام واللى يقله انت لسه فى مكانك ومحدش جه على نفسه ووقف معاه دقيقه كله بيكلمه وهو بيجرى ولا حد سئله انت عايز ايه ولا نفسك فى ايه .
محتار والله يا احمد وخايف حرتى تطول المهم مطولش عليك وسلامى لكل اللى عندك وبالاخص تسنيم امانه عليك سلملى عليها اوى اوى اوى جدا خالص وعلى فكره انا بحب الاسم دا بشكل اكتر مما تتصوروسلملى على كل من الموقع وخاصه مصعب ومنى ودعاء

وخلينا نشوفك فى اسكندريه قريب وعلى فكره اسكندريه فى الشتا جنه كان نفسى ابعتلك اى هديه بس مفيش امكانيه وسلم برده على الحاجه وخليها تدعيلى

اه قبل ما انسى بطل الهباب اللى بتشربه
-.-.-

.-.
من احلى ما غنى منير
الاغنيه - الالبوم

دور على الناس – فى عشق البنات

يا طير يا طاير- فى عشق البنات

المريله كحلى – يا اسكندريه

يا اسكندريه – يا اسكندريه

حتى حتى - وسط الدايره

ابشروا يا شباب – الارض والسلام

ممكن- ممكن

رزقنا على الله

البوم من اول لمسه

البوم الفرحه

البوم الملك هو الملك

ومتنساش ربك لما يريد

...---...---...---...

ردى على محمد

ماتراه سوف تسمعه